Аб’яднаны кабінет Ціханоўскай робіць стаўку на план “Перамога”
23 верасня 2022
77

Другая пастанова Аб’яднананага пераходнага кабінета Беларусі, прынятая 22 верасня 2022 года, тычыцца рэалізацыі плана “Перамога”, які выпрацаваны ініцыятывай Bypol.

Згодна з пастановай №2, прадстаўнік кабінета па законнасці і правапарадку, а адначасова і прадстаўнік Bypol Аляксандр Азараў мусіць прадставіць даклад аб гатоўнасці і тэрмінах рэалізацыі плана мабілізацыі “Перамога”.

На прадстаўніка па транзіце ўлады, а сёння гэта кіраўнік Народнага антыкрызіснага ўпраўлення Павел Латушка, ускладзены абавязак падрыхтаваць і накіраваць інструкцыі дзяржаўным служачым, якія заявілі аб гатоўнасці падтрымаць дэмакратычныя змены ў Беларусі, для наступнай рэалізацыі пры запуску плана “Перамога”, а таксама ўнесці на разгляд і зацвярджэннек абінету праект палажэння аб прысваенні воінскіх і спецыяльных званняў Беларусі.

Прадстаўнік па замежных справах Валерый Кавалеўскі мусіць прадставіць план дзеянняў па забеспячэнні практычных крокаў міжнароднай супольнасці ў падтрымку намаганняў Аб’яднанага кабінета па абароне незалежнасці, тэрытарыяльнай цэласнасці і аднаўлення суверэнітэту Рэспублікі Беларусь.

Усё гэта мусіць быць зроблена да 5 кастрычніка 2022 года, перадае тэлеграм-канал Аб’яднанага пераходнага кабінета.

Раней кабінет прыняў заяву, у якой патрабуе вывесці з тэрыторыі нашай краіны расійскія войскі і лічыць несапраўднымі двухбаковыя пагадненні паміж Рэспублікай Беларусь і Расійскай Федэрацыяй, якiя пагражаюць суверэнітэту, незалежнасці і нацыянальнай бяспецы Беларусі.

Ініцыятыва Bypol – гэта аб’ядненне былых беларускіх сілавікоў створаная для супрацьдзеяння лукашэнкаўскім уладам.