Мэрыем Герасіменка, Уладзімір Зубец, Аксана Манкевіч, Алег Галубоўскі, Генадзь Драздоў, Пётр Драздоў, Валянцін Міцкевіч, Кацярына Бібільнікава, Наталля Дуліна, Уладзіслаў Шаковіч, Ілля Астроўскі, Дзяніс Харунжы, Людміла Абразоўская, Руслан Ксёнжык і Дзяніс Панамароў прызнаныя палітвязнямі. Агульная іх колькасць дасягнула 1348 чалавек.

Абразоўская, Астроўскі, Бібільнікава, Пётр Драздоў, Генадзь Драздоў, Герасіменка, Галубоўскі, Дуліна, Зубец, Манкевіч, Міцкевіч, Харунжы і Шаковіча ўзятыя пад варту па абвінавачванні ў групавых дзеяннях, якія груба парушаюць грамадскі парадак (ч. 1 арт.342 КК). Ксёнжык і Панамароў накіраваныя ў папраўчую ўстанову адкрытага тыпу па тым жа абвінавачванні, паведамляе Праваабарончы цэнтр “Вясна”.

“Свабода мірных сходаў гарантаваная артыкулам 21 Міжнароднага Пакта аб грамадзянскіх і палітычных правах. Дадзеная свабода не падлягае ніякім абмежаванням, акрамя тых, што вызначаныя законам і неабходныя ў дэмакратычных краінах у мэтах нацыянальнай і грамадскай бяспекі, грамадскага парадку, аховы здароўя і маральнасці насельніцтва ці абароны правоў і свабод іншых асоб”, – нагадваецца ў паведамленні.

Праваабронцы патрабуюць неадкладнага вызвалення ўсіх палітвязняў і спынення палітычгых рэпрэсій ў Беларусі.

Нагадаем, што за верасень 2022 года ў Беларусі асудзілі больш за 110 чалавек па палітычных справах. За жнівень 2022 года праваабаронцы прызналі палітвязнямі 92 чалавек.