Кабінет Ціханоўскай не прызнае рэферэндумаў на акупаванай тэрыторыі Ўкраіны
25 верасня 2022
119

Аб’яднаны пераходны кабінет Святланы Ціханоўскай заявіў аб неадпаведнасці міжнароднаму праву ні ініцыятывы, ні працэсу, ні вынікаў рэферэндумаў, якія Расія праводзіць на акупаваных тэрыторыях Украіны.

З афіцыйнай заявай аб непрызнанні рэферэндумаў у частках Луганскай, Данецкай, Запарожскай і Херсонскай абласцей Украіны, якія захапіла Расія, выступіў 24 верасня 2022 года прадстаўнік кабінета па замежных справах Валерый Кавалеўскі. Відэа было размешчана ў тэлеграм-канале Аб’яднанага пераходнага кабінета.

Таксама Кавалеўскі нагадаў пра непрызнанне анексіі Крыму ў 2014 годзе. Ён прызнаў права Кіева на дэакупацыю гэтых тэрыторый любымі даступнымі сродкамі, а пераходны кабінет, у сваю чаргу, будзе аказваць усю магчымую падтрымку Ўкраіне.

Нагадаем, што раней Аб’яднаны пераходны кабінет прыняў заяву, у якой патрабуе вывесці з тэрыторыі нашай краіны расійскія войскі і лічыць несапраўднымі двухбаковыя пагадненні паміж Рэспублікай Беларусь і Расійскай Федэрацыяй, якiя пагражаюць суверэнітэту, незалежнасці і нацыянальнай бяспецы Беларусі.