Разбурыўшы школьную адукацыю на польскай мове, рэжым Лукашэнка пачаў знішчаць адукацыю на літоўскай. Гэта спрыяе росту непрыязнасці да беларусаш, лічыць прадстаўніца Офіса Святланы Ціханоўскай па пытаннях адукацыі і навукі Таццяна Шчытцова.
«Услед за разбурэннем школьнай адукацыі на польскай мове ў Гародні, рэжым Лукашэнкі ўзяўся за знішчэнне школ з выкладаннем на літоўскай мове. У Беларусі ўсяго дзве такія школы – у Пелясах і Рымдзюнах. 12 жніўня стала вядома, што па выніках праверкі МНС Пелясскую сярэднюю школу зачыняюць. Фармальная прычына-невыкананне правілаў бяспекі. Пры гэтым прадстаўнікі літоўскага боку падкрэсліваюць, што падчас ранейшых праверак ніякіх заўваг такога роду не было», – распавядае прадстаўніца Офіса на сайце “Святлана Ціханоўская“.
Паводле яе, ушчамленне правоў літоўцаў і палякаў на навучанне на роднай мове з’яўляецца парушэннем двухбаковых і міжнародных дамоўленасцяў, якія абараняюць правы прадстаўнікоў нацыянальных меншасцяў. Такая палітыка з боку лукашэнкаўскіх уладаў спрыяе ўзнікненню міжнацыянальных канфліктаў у беларускім грамадстве. Акрамя таго, яна чарговы раз паказвае, што пры Лукашэнку беларуская дзяржава як суб’ект міжнароднага права не можа і не мае намеру прытрымлівацца міжнародных пагадненняў.
«Не выключана, што рэжым Лукашэнкі разлічвае цяпер на аналагічныя дзеянні ў адказ з боку Літвы і Польшчы, на рост непрыязнасці ў дачыненні да беларусаў, якія пражываюць у гэтых постацях. Аднак падобныя разлікі марныя, таму што ў дэмакратычных краінах правы нацыянальных меншасцяў, уключаючы беларусаў, абараняюцца законам і забяспечваюцца адпаведнай дзяржаўнай палітыкай», – упэўнена Таццяна Шчытцова.
Яна адзначае, што беларусы, якія пражываюць у Літве і Польшчы маюць законнае права на захаванне сваёй нацыянальнай ідэнтычнасці і добрыя магчымасці развіваць самыя розныя культурныя і адукацыйныя ініцыятывы на беларускай мове.
У красавіку стала вядома, што ў літоўскіх школах Беларусі больш не будуць выкладаць на літоўскай мове – навучанне будзе весціся толькі на рускай альбо беларускай мовах. Тое ж самае датычыцца школ з польскай мовай навучання.
Матэрыялы па тэме: