У кабінеце Ціханоўскай распачалі перапіс беларускіх культурніцкіх ініцыятыў
10 кастрычніка 2022
177

Даць інфарацыю пра ўсе магчымыя культурніцкія праекты, якія рэалізуюцца для беларусаў, просіць прадстаўніца Аб’яднанага пераходнага кабінета па нацыянальным адраджэнні Аліна Коўшык.

Падзяліцеся з намі сваімі любімымі ініцыятывамі, за якімі сочыце, якія вас натхняюць, ці якія вы ствараеце. А мы іх каталагізуем і зробім так, каб пра іх даведвалася болей людзей”, – напісала Коўшык 10 кастрычніка 2022 года ў Facebook.

Гэта могуць быць суполкі, сайты, тэлеграм, ТыкТок, Youtube, месцы, школы, культура, мова, гісторыя, памяць, літаратура, кіно, мастацтва, адукацыя фармальная і нефармальная. “Усе, што яднае нас і дапамагае заставацца беларусамі”, – падкрэсліваецца ў паведамленні аб пачатку перапісу беларускіх культурніцкіх ініцыятыў.

Нагадаем, што Аліна Коўшук увайшла ў Аб’яднаны пераходны кабінет Святланы Ціханоўскай у сярэдзіне верасня 2022 года. На яе, у прыватнасці, ускладзена праца па стварэнні стратэгіі нацыянальнага адраджэння; папулярызацыі ведаў па гісторыі, культуры і мове; падрыхтоўцы рэформы ў галіне культуры, адукацыі, СМІ; каардынацыі дзейнасці інстытутаў і ініцыятываў у пытаннях адукацыі, гісторыі і культуры; спрыянні супрацьдзеянню інфармацыйнай агрэсіі.