Беларусы Варшавы на традыцыйнай нядзельнай акцыі 25 снежня 2022 года падвялі вынікі свайго гадавога грамадскага змагання за лепшы лёс роднай краіны.

“Мінуў яшчэ адзін год нашага змагання за свабоду і лепшы лёс нашай бацькаўшчыны. Яшчэ адзін год штотыднёва мы выходзілі ў цэнтр Варшавы каб сказаць “НЕ” крывавым дыктатарскім рэжымам Лукашэнкі і Пуціна”, – паведамляе тэлеграм-канал “Беларусы зарубежья”.

Удзельнікі акцыі адзначалі, што за гэты год яны годна неслі беларускія сцягі на плячах і размаўлялі з польскім грамадствам нашымі плакатамі. “Увесь год мы былі голасам беларусаў!” – сцвярджаюць яны.

Паводле мітынгоўцаў, дыктатура ў Беларусі будзе знішчана толькі ў выніку маленькіх, але настойлівых крокаў. “Кожная акцыя, кожны ўчынак салідарнасці, кожная валанцёрская дапамога, кожны ліст палітвязню, кожны рэпост ў сацсетках, кожны крок дапамогі ваярам ва Ўкраіне набліжае нас да перамогі”, – упэўнены яны.

Мерапрыемства прайшло каля помніка Мікалаю Каперніку, паведамляе тэлеграм-канал “Акцыі беларусаў Варшавы“.

Нагадаем, што 18 снежня 2022 года варшаўскія беларусы выйшлі на мітынг пратэста супраць усялякіх пагадненняў Аляксандра Лукашэнкі з расійскім прэзідэнтам Уладзімірам Пуціным, прыгадаўшы, што ў Мінску няма легітымнай улады.

Адзначым, што варшаўскія беларусы штотыдзень выходзяць на нядзельныя акцыі, прыцягваючы ўвагу да сітуацыі ў Беларусі.

Фота: тэлеграм-канал “Беларусы зарубежья”